cambio climático e contaminación
cambio climático
O aumento das temperaturas globais e os cambios nos patróns de precipitación, están a alterar os ecosistemas, provocando a perda de hábitat e desprazando os rangos de distribución de moitas especies de aves, insectos e morcegos.
As aves migratorias dependen de sinais ambientais para sincronizar os seus movementos estacionais, polo que o cambio climático implica unha desincronización cos seus recursos, para afectar á súa capacidade de reprodución e supervivencia. Ademais, tamén se ven afectadas polo aumento do nivel do mar, que provoca a perda dos seus hábitats.
Os incendios e as secas, cada vez máis frecuentes e intensas, destrúen zonas chave para a fauna aérea, causan a perda directa de especies, e fragmentan e illan as súas poboacións. O aumento das choivas torrenciais provoca inundacións e esvaradías de terra que destrúen niños e áreas de reprodución, e afectan tamén a moitas especies de insectos.
As altas temperaturas aumentan a concentración de contaminantes atmosféricos, como o ozono troposférico inflúe tamén na saúde da fauna aérea, especialmente aquela con sistemas respiratorios sensibles.
En Galicia a contaminación do aire por ozono ten repuntado nos últimos anos debido ao aumento das temperaturas medias.
contaminación ambiental
O uso de praguicidas químicos (fitosanitarios) provoca o desprazamento das aves desas zonas, coa consecuente degradación do ecosistema, xa que reduce a dispoñibilidade de hábitats e de alimentos, especialmente durante a cría.
O uso de agrotóxicos representa un grave perigo para a cadea trófica, que compromete a calidade ambiental e a diversidade biolóxica, sobre todo dos insectos, principais afectados. Ademais, a contaminación da auga con produtos químicos (pesticidas e fertilizantes), envelena as aves e os insectos acuáticos.
Os contaminantes químicos e residuos plásticos afectan directamente ás aves e os insectos, debilitan a súa saúde e reducen a súa capacidade de reprodución e supervivencia. E os contaminantes atmosféricos, como o óxido de nitróxeno e outros compostos orgánicos volátiles, danan as vías respiratorias e afectan ó sistema inmunolóxico das aves, morcegos e insectos.
As macrogranxas son outro vector daniño en canto á contaminación das augas, non só afectando á fauna aérea, senón mesmo á poboación humana.
contaminación lumínica
Por outra banda, a contaminación luminosa altera os ritmos naturais de aves e morcegos, impídelles realizar a súa función de dispersión de sementes e confunde aquelas na súa navegación. Lembremos que ademais do voo, o que caracteriza as aves é a súa visión, e a luz artificial desoriéntaas provocando colisións e dificultando a localización de lugares de aniñamento e alimentación. Ao ser unha exposición constante, tamén interfire nos ciclos reprodutivos e de descanso. Este artigo da USC expón de forma concreta este problema: A contaminación lumínica: unha trampa para as aves
De feito, Dinamarca e Países Baixos están a dar os primeiros pasos cara a un ambiente amigable coa fauna silvestre, remodelando unha gran cantidade de farois para proxectar luz vermella durante a noite co propósito de coidar a os morcegos e outras formas de fauna nocturna. Esta medida non nos afecta en absoluto aos humanos, xa que o noso cerebro ten a capacidade de suprimir a cor vermella e adaptarse rapidamente. En só uns minutos, o noso cerebro percibirá a iluminación como branca.