Prismáticos, lupa

As aves nunca están preto polo que o primeiro que temos que facer é “aproximarnos visualmente”. É moi importante o uso de prismáticos ou binoculares.

Para observar aves, o número ideal de aumentos está entre 8 e 10, mentres que o tamaño da pupila de saída estaría entre 30 e 42 milímetros. Os prismáticos óptimos serían os comprendidos entre 8×30 mm e 10×42 mm. Os primeiros son máis útiles para observar aves en hábitats con vexetación a curta distancia; os segundos ofrecen vantaxe en áreas abertas, ou no mar.

Dado que os insectos adoitan estar máis quietos, unha lupa pode ser útil para ver detalles que a simple vista non se aprecian.

TELESCOPIO

Cando chegas a unha lagoa ou a un esteiro, por exemplo, as aves están lonxe e os prismáticos quedan curtos, polo que é o momento de pensar nun telescopio. É preciso un telescopio terrestre que teña un zoom para localizar as aves e afinar detalles a gran distancia. Para usalo é imprescindible un trípode, robusto e lixeiro.

Para axudarche a recoñecer a fauna aérea do lugar, poñemos a túa disposición un buscador nesta web para consultar aves, insectos e morcegos.

gUÍAS DE CAMPO/RECURSOS EN REDE

Ademais, ofrecémosche unhas ligazóns que tamén poden ser útiles:

Seobirdlife: guía aves: https://seo.org/guia-de-aves/

Morcegos de Galicia: ofrece un atlas de distribución dos morcegos por toda Galicia:

http://www.morcegosdegalicia.org/mapa_especies.php?idioma=gl

Aplicacións para recoñecemento de especies mediante fotos como: Seek (iNaturalist). Identifica animais silvestres, plantas e fungos simplemente fotografándoos .

BirdNET ou Merlín, son aplicacións para recoñecemento de aves mediante a gravación dos seus cantos.

VISITAS

Para aprender de expertos/as podes apuntarte a visitas guiadas para a observación de fauna aérea. O Museo de Historia Natural (MHN) de Santiago conta cunha Asociación de Amigos do MHN, que periodicamente organiza visitas guiadas para recoñecemento de aves, insectos e morcegos. Na web Morcegos de Galicia tamén podes informarte sobre visitas e as actividades que organizan.

Caderno de campo e fichas de observación

Apuntar as aves que vemos, o momento e o lugar da observación, as súas características, o número e o comportamento é fundamental.

En Recursos ofrecémosche algúns modelos de fichas de observación de aves e insectos. Un caderno pequeno, flexible e resistente vai ser unha ferramenta moi útil. Os de tapas semirríxidas e cosidos son os mellores.

Vestimenta, calzado, mochilas

• Non merques un equipo moi sofisticado, pero convén protexernos do frío, do sol ou da chuvia: forros polares, impermeables, gorros, luvas, sombreiros…
• Vestir cores discretas para pasar inadvertidas durante as nosas saídas.

O calzado é importante para estar cómodos: non é agradable observar aves cos pés fríos e mollados; como tampouco o é camiñar por un terreo pedregoso con sandalias, polo que é moi importante escoller o adecuado.

O equipo non estaría completo sen unha mochila para transportar auga, comida e a guía de campo.

Tamén é importante documentar as nosas observacións con fotos, de xeito que son moi útiles as cámaras réflex cun gran teleobxectivo

Son decenas as sociedades ornitolóxicas existentes. En Galicia podemos destacar a Sociedade Galega de Ornitoloxía (SGO, www.sgosgo.org ), Grupo Naturalista Hábitat (gnhabitat.org) , ou a Sociedade Galega de Historia natural (SGHN)

Estas organizacións dispoñen de foros de debate especializados nos que imos atopar resposta a moitas dúbidas, e nos que poderemos informarnos e compartir coñecementos con outras persoas interesadas na observación de aves.

Outras formas de observar aves no seu hábitat

Saíndo ao campo con observadores experimentados imos aprender rapidamente. Sempre é importante comentar as nosas observacións e escoitar outros observadores: debemos mellorar as nosas habilidades, e incrementaremos os nosos coñecementos sobre as aves.

Turismo ornitolóxico mediante o acompañamento dunha guía experta que facilite atopar e identificar correctamente as aves e aprender sobre os seus ecosistemas. Existen proxectos e iniciativas tanto de institucións públicas como de empresas privadas (por exemplo, Spainbirds: https://www.spainbirds.com/ e Wildwatching Spain: https://wildwatchingspain.com/ )

A web de Turismo de Galicia (https://www.turismo.gal/que-facer/birding-in-galicia?langId=es_ES) ofrece unha boa información se queremos ampliar as nosas actividades de observación a outras zonas de Galicia.

Observar aves sen moverse da casa: unha maneira de observar aves sen deixar pegada e sen custo algún, nin económico nin de esforzo. A través de webcams situadas nos lugares de maior interese ornitolóxico do país; transmiten imaxes en directo a través da páxina web (introduce no buscador webcam aves).

Observación de aves desde un agocho privado: Naturaprop (https://www.naturaprop.com/ca) é unha iniciativa que ofrece dous agochos que se poden alugar por horas e que permiten observar a fauna autóctona da zona sen que as aves se decaten da presenza humana e, polo tanto, sen causarlles molestias.

Aviturismo nas cidades, como por exemplo Ver Aves ( https://www.birdinginspainswildwest.com/inicio) que ofrecen avistamentos de aves urbanas de cidades como Madrid.